Një valë e madhe tifozësh nga Lombardia dhe gjithë Italia po përgatiten për të udhëtuar drejt Bavarisë në prag të finales së Ligës së Kampionëve midis PSG-së dhe Interit.
Pavarësisht mungesës së biletave të mjaftueshme, pasioni për të parë ekipin e zemrës në një finale të tillë është i jashtëzakonshëm — një ngjarje që nuk ndodh shpesh (përveç tifozëve të Real Madridit). Prandaj, pritet që rreth 40,000 tifozë zikaltër të mbërrijnë në Mynih të shtunën, megjithëse vetëm 18,000 prej tyre kanë në dorë biletën për në “Allianz Arena”.
Përveç këtyre 18,000 bileteve të dedikuara nga Interi për tifozët e tij më të përkushtuar, UEFA ka shpërndarë edhe 30,000 bileta nëpërmjet shortit, para se finalistët të ishin të njohur — dhe besohet se një pjesë e madhe e tyre ka përfunduar te tifozët zikaltër.
Interi ka organizuar një pikë takimi në Odeonsplatz, ku tifozët do të mund të festojnë së bashku. Nga ora 11:00 deri në 16:00 të shtunën, aty do të ketë performanca artistike, përshëndetje nga legjendat e klubit dhe mundësi për të blerë suvenire me ngjyrat e Interit.
