Mbrëmjen e djeshme, Rusia ka ndërmarrë një sulm të gjerë ajror ndaj Ukrainës, si kundërpërgjigje ndaj një operacioni të mëparshëm të Kievit, që goditi bazat ajrore ushtarake ruse.
Të paktën 5 persona kanë humbur jetën, përfshirë një fëmijë 18 muajsh, ndërsa rreth 80 të tjerë kanë mbetur të plagosur rëndë. Sulmi përfshiu raketa balistike, dronë dhe bomba dy-tonëshe, duke shkatërruar zona të mëdha urbane në qytete të ndryshme. Qyteti më i goditur është Kharkivi, i cili përjetoi një prej netëve më të tmerrshme që nga fillimi i luftës.
“Kharkivi po përjeton aktualisht sulmin më të fuqishëm që nga fillimi i luftës në shkallë të plotë”, deklaroi kryebashkiaku Igor Terekhov përmes Telegramit, duke përshkruar një breshëri të koordinuar raketash dhe bombash që godisnin njëkohësisht qytetin.
Reagime ndërkombëtare nuk munguan. Ish-presidenti amerikan Donald Trump komentoi se veprimet e Ukrainës i kanë dhënë Kremlinit një justifikim për hakmarrje.
“Ata i dhanë Putinit një arsye për të hyrë dhe për të bombarduar. Kjo është ajo që nuk më pëlqeu. Kur e pashë, mendova: tani do të ketë hakmarrje”, u shpreh Trump para gazetarëve.
Ai shtoi se shpreson që konflikti të mos degjenerojë në një luftë bërthamore: “Shpresoj që jo”, u përgjigj ai shkurt.
Kujtojmë se më 1 qershor, Ukraina kreu një nga operacionet më të guximshme në kuadër të luftës, duke sulmuar katër aeroporte kryesore ushtarake ruse me dronë. Si pasojë, u dëmtuan 41 avionë, përfshirë bombardues të rëndë dhe njësi të rralla zbulimi A-50. Kievi pretendon se me këtë aksion ka neutralizuar rreth 34% të flotës së bombarduesve strategjikë të Rusisë.
Situata mbetet kritike, me tensione që rriten çdo ditë dhe pasiguri për ecurinë e mëtejshme të konfliktit.
