Ish-drejtori i Shërbimit Informativ të Shtetit në Berat, Aleksandër Shulla, dhe djali i tij, Pandeli Shulla, po hetohen nga Prokuroria për lojëra fati, armë pa leje dhe nxjerrje të sekretit shtetëror.
Hetimi nisi pas një kontrolli të rastësishëm në lokalin e Pandeli Shullës, ku u gjetën kompjutera për lojëra online. Kontrolli u shtri edhe në banesën e tyre, duke zbuluar municione dhe USB me të dhëna të dyshuara sensitive.
Aleksandër Shulla, që ka drejtuar SHISH Berat deri në nëntor 2023, ka pranuar se dorëzoi armatimin, por jo municionin e gjetur në banesë. Ky rast ka shkaktuar tronditje në opinion dhe ka zbuluar probleme të thella në strukturat e inteligjencës në qytet.
