Kryebashkiaku i Nju Jorkut, Eric Adams, i cili ndodhet drejt fundit të mandatit të tij, ka zgjedhur të kalojë gati një javë në Shqipëri — një udhëtim që ka ngjallur reagime të shumta në Shtetet e Bashkuara.
Sipas The New York Times, Adams udhëtoi drejt Shqipërisë të dielën për bisedime mbi biznesin dhe turizmin, ndërsa është planifikuar të takohet edhe me kryeministrin Edi Rama. Vizita vjen vetëm pak ditë pasi Adams njoftoi se do të tërhiqej nga fushata për rizgjedhje, pas rënies së ndjeshme të mbështetjes në sondazhe.
Zëdhënësja e tij, Kayla Mamelak Altus, konfirmoi se qëndrimi i Adams në Shqipëri do të zgjasë deri të enjten. Sipas saj, qeveria shqiptare po mbulon shpenzimet e hotelit dhe transportit tokësor, ndërsa taksa-paguesit e Nju Jorkut do të paguajnë udhëtimin ajror të kryebashkiakut dhe shoqërueses së tij, ndihmësen Gladys Miranda, si dhe kostot e sigurisë. Hoteli kushton rreth 200 dollarë nata, ndërsa transporti 90 dollarë në ditë.
Adams udhëton në Shqipëri me ftesë të kryeministrit Rama, i cili është përmendur disa herë në aktakuzën federale ndaj ish-zyrtarit të lartë të FBI-së Charles McGonigal, megjithëse vetë Rama nuk është akuzuar për asnjë shkelje.
Në Tiranë, Adams pritet të takohet me përfaqësues të biznesit dhe teknologjisë, të vizitojë fabrika dhe të diskutojë mundësitë për rritjen e shkëmbimeve ekonomike dhe turistike mes Shqipërisë dhe qytetit të Nju Jorkut.
Megjithatë, udhëtimi i tij ka hapur debat në Nju Jork, pasi shumë kritikë e akuzojnë kryebashkiakun se po i kushton më shumë rëndësi udhëtimeve jashtë shtetit sesa problemeve të qytetit që drejton. “Mendova se ishte shaka kur dëgjova se po shkonte në Shqipëri”, është shprehur këshilltarja Gale Brewer, duke shtuar se Adams duhet të përqendrohet në çështje si arsimi dhe strehimi në ditët e fundit të mandatit të tij.
Lidhjet e Adams me Shqipërinë datojnë që më herët. Djali i tij, Jordan Coleman, mori pjesë në versionin shqiptar të “American Idol” në vitin 2022. Vetë kryebashkiaku ka organizuar tre ceremoni ngritjeje flamuri shqiptar në Nju Jork dhe në qershor mbajti një festë të kulturës shqiptare në Gracie Mansion, rezidenca zyrtare e kryebashkiakut.
Në një intervistë të dhënë gjatë Asamblesë së Përgjithshme të OKB-së, Adams i kishte thënë moderatores shqiptare Alketa Vejsiu se “është xheloz për të birin që ka qenë në Shqipëri dhe ka performuar atje”, duke shtuar se “e kishte një dëshirë të madhe për ta vizituar vetë vendin”.
Kryebashkiaku udhëtoi me Lufthansa, me ndalesë në Frankfurt, pa dalë nga aeroporti. Ai pritet të kthehet në Nju Jork në fund të javës.
📰 Burimi: The New York Times
📅 Publikuar më: 6 tetor 2025
✍️ Përgatiti për web: Tendencainfo.al
https://www.nytimes.com/2025/10/06/nyregion/eric-adams-albania.html
