OBSH paralajmëron se më shumë se gjysma e rasteve të reja me HIV në Europë identifikohen me vonesë, duke kufizuar mundësinë për trajtim të hershëm dhe efektiv. Raporti i fundit i OBSH-së dhe ECDC-së tregon se 54% e diagnozave në kontinent dhe 48% në vendet e BE/EEA-s bëhen vetëm pasi infeksioni ka avancuar ndjeshëm.
Shumë pacientë rezultojnë me nivele të ulëta të qelizave CD4, ndërsa rreth një e treta zbulohen në fazë të rëndë të HIV-it. Diagnoza e vonë prek më së shumti burrat heteroseksualë, përdoruesit e drogës me injeksion dhe personat e moshuar.
Sipas Hans Kluge, drejtor rajonal i OBSH-së, gjithnjë e më shumë njerëz jetojnë me HIV pa qenë të diagnostikuar, duke rritur zinxhirin e transmetimit. Ai thekson se stigma dhe paragjykimi vazhdojnë të mbeten pengesa kryesore ndaj testimit.
Në përgjigje të situatës, OBSH dhe ECDC kërkojnë veprime të menjëhershme: më shumë testime të rregullta, zgjerimin e vetë-testimit dhe përfshirjen e grupeve që shpesh mbeten jashtë shërbimeve shëndetësore.
