Mot i keq i shoqëruar me reshje intensive shiu ka përfshirë të gjithë vendin, duke sjellë problematika serioze nga veriu në jug.
Në Lezhë, sasia e madhe e reshjeve ka shkaktuar përmbytje të banesave, tokave bujqësore dhe oborreve të shkollave, ndërsa lumi Drin ndodhet pranë kuotave.
Në Durrës, reshjet e dendura kanë bërë që rrugët të përmbyten në disa zona, duke vështirësuar qarkullimin dhe jetën e përditshme të banorëve. Është regjistruar edhe përhapje e ujit në ambiente të ndryshme urbane, duke kërkuar ndërhyrje të shpejtë.
Edhe në Shkodër dhe Malësinë e Madhe janë raportuar përmbytje të banesave dhe dëmtime infrastrukturore; disa familje janë prekur drejtpërdrejt nga situata.
Megjithatë, nivelet e lumenjve Buna dhe Drin mbeten për momentin nën kuotat më të larta të rrezikut.
Në Kukës, pavarësisht reshjeve të dendura, nuk raportohen probleme të mëdha në qarkullim apo përmbytje të banesave.
Në qarkun e Gjirokastrës, reshjet e shoqëruara me erëra të forta kanë shkaktuar rënie inertesh në aksin Tepelenë–Gjirokastër, duke kufizuar lëvizjen në këtë segment rrugor.
Në Vlorë, situata paraqitet relativisht më e qetë; në disa zona periferike ka pasur ndërprerje të përkohshme të energjisë elektrike, ndërsa furnizimi me ujë të pijshëm vijon normalisht.
