Miliarderi Elon Musk ka njoftuar largimin e tij nga administrata e Presidentit Donald Trump, duke theksuar se mandati i tij si Punonjës i Posaçëm Qeveritar ishte i përkohshëm. Megjithatë, vendimi i Musk vjen në një kohë kur marrëdhëniet me Presidentin janë ftohur ndjeshëm, si pasojë e mosmarrëveshjeve mbi politikat qeveritare.
Në një postim në platformën X, Musk falënderoi Trump për mundësinë, por njëkohësisht la të kuptohet për ndarjen e qëndrimeve. “Ndërsa koha ime e planifikuar si Punonjës i Posaçëm Qeveritar po mbaron, do të doja të falënderoja Presidentin @realDonaldTrump për mundësinë për të zvogëluar shpenzimet e panevojshme,” shkroi ai.
Ai gjithashtu siguroi se misioni i projektit DOGE nuk do të ndalet: “Misioni @DOGE vetëm sa do të forcohet me kalimin e kohës, ndërsa do të bëhet një mënyrë jetese në të gjithë qeverinë.”
Vetëm një ditë më parë, në një intervistë për CBS News, Musk u shpreh i zhgënjyer nga Presidenti Trump, duke thënë se politikat e tij kanë minuar përpjekjet e bëra nga iniciativa DOGE. Mbetet për t’u parë se si do të evoluojë marrëdhënia mes tyre pas këtij largimi.
