Evropa po përjeton një nga shpërthimet më serioze të gripit të shpendëve në pothuajse një dekadë, sipas raportit të fundit të Autoritetit Evropian të Sigurisë Ushqimore (EFSA).
Nga 6 shtatori deri më 14 nëntor 2025, në 26 vende evropiane janë konfirmuar 1,443 raste të virusit shumë patogjen HPAI A(H5) te shpendët e egër — një rritje katërfish krahasuar me të njëjtën periudhë të vitit të kaluar dhe niveli më i lartë që prej vitit 2016.
Këtë herë, më të prekur rezultojnë shpendët e ujit, me virusin e zbuluar edhe te zogj që dukeshin të shëndetshëm, çka sipas ekspertëve tregon një kontaminim të gjerë të mjedisit dhe një qarkullim më agresiv të virusit.
Gjermania, Franca dhe Spanja raportojnë shpërthimet më të mëdha, duke ngritur alarmin për ndikime të mundshme afatgjata në popullatat e shpendëve të egër.
Rritja e infeksioneve në natyrë shton rrezikun për përhapje në fermat e shpendëve dhe për shfaqjen e varianteve të reja të virusit. Megjithëse rreziku për njerëzit vlerësohet i ulët, autoritetet në të gjithë kontinentin po forcojnë monitorimin epidemiologjik dhe masat e bio-sigurisë.
