Kështjella si ato të Disney-t të vendosura mbi kodra fotogjenike, rrugica me kalldrëm që përdridhen e kthehen, duke të çuar ose në një shesh të fshehtë, ose në një kopsht sekret, dhe të gjitha ato fasada të zbukuruara e detaje arkitekturore të gdhendura me mjeshtëri që të lënë pa frymë:
Evropa është destinacioni i duhur për të përjetuar gjithë atë hijeshi të botës së vjetër, dhe pa u fshehur pas fjalëve — është vendi ku njerëzit shkojnë për t’u mahnitur nga bukuria e pastër, pa qiellgërvishtëse të mërzitshme dhe ndotje urbane që i sheh çdo ditë.
Megjithatë, Evropa është një kontinent mjaft i madh, dhe meqë është e mbushur me qytete “kartoline”, mund të jetë e vështirë të përzgjidhen vetëm 5 më të bukurat. Fatmirësisht për ne, revista Travel + Leisure e ka gjetur përgjigjen:
🇮🇹 Roma, Itali
Bazuar në votat e gati 180,000 lexuesve të revistës së njohur të udhëtimeve dhe stilit të jetesës, Roma renditet si qyteti i pestë më i bukur në Kontinentin e Vjetër, me një vlerësim prej 88.91 pikësh.
Një muze i hapur në ajër të lirë, plot me mrekulli antike — do të plakesh vetë përpara se të arrish të shohësh e shijosh gjithçka që Roma ka për të ofruar.
Nëse flasim për bukuri mahnitëse, koleksioni i pafund i kishave madhështore është një pikënisje e shkëlqyer.
Xhevahiri i Vatikanit, Bazilika e Shën Pjetrit, është padyshim më mbresëlënëse vizualisht, me kupolën e saj të projektuar nga Mikelanxhelo dhe zbukurimet me ar. Ndërsa Santa Maria Maggiore shquhet për mozaikët e shekullit të 5-të dhe tavanin e artë. E si mund të harrojmë Panteonin — fillimisht tempull romak, sot kishë katolike — një mrekulli e inxhinierisë antike që duket gati hyjnore, sidomos kur rrezet e diellit depërtojnë nga qendra e kupolës, duke krijuar një lidhje simbolike mes Tokës dhe Qiellit.
Dhe pastaj vijnë rrugicat me kalldrëm, shatërvanët e zbukuruar (kush s’e ka dëgjuar Fontana di Trevi?) dhe, natyrisht, Kolosseumi madhështor që qëndron krenar prej dy mijë vitesh.
Në fund të fundit… a janë të sigurt lexuesit e T+L që Roma meriton vetëm vendin e pestë?
🇹🇷 Stambolli, Turqi
Me 89.47 pikë, Stambolli renditet i katërti në listë, dhe konsiderohet kryeqyteti kulturor — edhe pse jo zyrtari — i Turqisë.
Një metropol gjigant që shtrihet në dy kontinente: pjesa veriore në Evropën Juglindore dhe ajo jugore në Azi. Pikërisht këtu takohen Perëndimi dhe Lindja, dhe arkitektura e qytetit e vërteton këtë.
Nga bazilikat bizantine të shndërruara në xhami (si Hagia Sophia), te monumentet osmane mahnitëse (si Xhamia Blu), e deri tek rrugicat me kafene e kalldrëm — çdo cep i qytetit është një përzierje perfekte e historisë shumëqindvjeçare me jetën moderne.
Kur të shkoni në Stamboll, mos humbisni Pallatin Dolmabahçe, që shpesh quhet “Versaja Turke”, Kullën Galata, ndërtuar nga gjenovezët në Mesjetë, dhe lagjet shumëngjyrëshe Balat & Fener, plot fasada të gjalla dhe dyqane antike.
🇪🇸 Granada, Spanjë
Një qytet i vogël në jug të Spanjës, Granada renditet e treta më e bukur në Evropë, me një vlerësim prej 89.48 pikësh.
E vendosur në kodrat me diell të Andaluzisë, ajo ishte fortesa e fundit myslimane në Gadishullin Iberik para se spanjollët të merrnin kontrollin — dhe ende ruan pamjen e një qyteti të Afrikës Veriore.
Për shumë shekuj gjatë Mesjetës, jugu i Spanjës ishte nën sundimin islamik, dhe Granada ishte “kalifati” i fundit që ra në duart e të krishterëve.
Në qendër të saj ngrihet Alhambra, fortesa më e madhe e ndërtuar ndonjëherë nga arabët — një kompleks pallatesh të rrethuar nga kopshte të gjelbëruara dhe mure të pathyeshme.
Në këmbët e saj ndodhet Albaicín, lagjja myslimane, me shtigje të ngushta, shtëpi të bardha dhe banja të ruajtura nga koha e maurëve.
Megjithëse madhështia arkitekturore e Granadës vjen nga sundimtarët afrikanë, periudha pas-kristiane solli gjithashtu perlat e veta: Bazilika e San Juan de Dios me interierët e artë dhe afresket, si edhe Katedralja e Granadës me fasadën e saj rinashentiste.
🇪🇸 Sevilja, Spanjë
Kryeqyteti i Andaluzisë, Sevilja, zë vendin e dytë në renditjen e T+L, me 89.49 pikë, për hirin dhe gjallërinë e saj.
Është një nga qendrat kulturore kryesore të Spanjës, me një trashëgimi që nis nga romakët e lashtë, kalon te maurët dhe përfundon te Perandoria Spanjolle.
Lagjja Santa Cruz është zemra historike e Seviljes, me rrugica të ngushta, ballkone me lule dhe dy monumente madhështore: Katedralja e Seviljes, dikur një xhami maure, dhe Alcázar, një pallat mbretëror nga periudha islame.
Në anën tjetër të lumit Guadalquivir, në lagjen Triana, do të gjeni valltarë flamengoje, punishte qeramike dhe taverna shekullore që shërbejnë patatas bravas dhe supën tradicionale salmorejo.
Por vepra e artit më e madhe e Seviljes është padyshim Plaza de España, një shesh gjysmëhënor i rrethuar nga një kanal — i konsideruar gjerësisht si sheshi publik më i bukur në të gjithë Spanjën.
🇮🇹 Firence, Itali
E shpallur së fundmi si destinacioni më i bukur i Italisë, përpara Romës, Venecias dhe Milanos, Firence është zyrtarisht qyteti më i bukur i Evropës, me 90.08 pikë — dhe me plot të drejtë.
Në fakt, fjala “Firence” mund të bëhet sinonim i fjalës “e mrekullueshme” në fjalorin Oxford.
Qyteti ku lindi Rilindja, që solli në jetë gjeni si Leonardo da Vinci, Makiaveli, Brunelleschi (i cili projektoi kupolën e famshme të qytetit) dhe Galileo Galilei, është përkufizimi i një kryeqendre evropiane të kulturës.
Një shëtitje në qytetin e vjetër, mes ndërtesave okër dhe Duomos madhështor me fasadë mermeri në ngjyra të bardha, jeshile dhe rozë, është një përvojë që s’të harrohet.
Kaloni mbi Ponte Vecchio, urën e mbuluar me dyqane që daton nga Mesjeta, ose ngjiteni në Piazzale Michelangelo për të parë perëndimin mbi kambanorët e Firences — dhe do të dashuroheni më shpejt se sa mund të shqiptoni fjalët buchette del vino.
PËRKTHYER NGA: TRAVELOFFPATH
