Të dielën, më 26 tetor 2025, Shqipëria do të rikthehet në orën diellore, duke i kthyer akrepat 60 minuta pas. Ndërrimi do të ndodhë në orën 03:00 të mëngjesit, kur ora do të kthehet në 02:00, duke i dhënë të gjithëve një orë më shumë gjumë.
Kjo do të thotë se mbrëmjet do të errësohen më herët, ndërsa mëngjeset do të jenë më të ndritshme për disa muaj. Ora diellore do të mbetet në fuqi deri më 29 mars 2026, kur vendi do të kalojë sërish në orën verore (ligjore).
Të gjitha pajisjet elektronike dhe telefonat inteligjentë përditësohen automatikisht, por këshillohet që qytetarët të kontrollojnë orët analoge apo ato të automjeteve për të shmangur konfuzionin të hënën në mëngjes.
🕐 Kuriozitete për ndërrimin e orës:
Ideja e parë për ndryshimin e orës i përket Benjamin Franklin në vitin 1784, i cili sugjeroi që njerëzit të zgjoheshin më herët për të kursyer qirinj gjatë verës.
Zbatimi i parë zyrtar ndodhi gjatë Luftës së Parë Botërore, kur Gjermania dhe më pas Britania vendosën ta përdornin për kursimin e energjisë elektrike.
Sipas disa studimeve, në ditët pas ndërrimit të orës, rritet numri i aksidenteve rrugore dhe incidenteve në punë, për shkak të ndryshimit të ritmit të gjumit.
Disa vende, si Islanda, Japonia dhe Kina, nuk e ndryshojnë kurrë orën, pasi e konsiderojnë të panevojshme.
Në vitin 2019, Parlamenti Evropian votoi për të hequr ndryshimin sezonal të orës, por vendet anëtare ende nuk janë dakordësuar për një datë të përbashkët zbatimi.
📅 Mos harroni: në orën 03:00 të dielën, ktheni akrepat në 02:00 dhe shijoni një orë më shumë pushim.
