Një sulm i armatosur tronditi mbrëmjen e së hënës Midtown Manhattan, duke shkaktuar katër viktima, mes tyre një efektiv policie dhe vetë autorin e dyshuar. Ngjarja ndodhi në një godinë shumëkatëshe në Park Avenue, ku ndodhen edhe zyrat e Ligës Kombëtare të Futbollit Amerikan (NFL), dhe përfshiu skena paniku në rrugë.
Autori i dyshuar, Shane Devon Tamura, 27 vjeç nga Las Vegasi, pasi qëlloi mbi disa persona, i dha fund jetës duke qëlluar veten. Ai kishte një histori problemesh të shëndetit mendor, ndërsa dokumente të gjetura mbi trupin e tij tregonin pakënaqësi të thellë ndaj NFL-së për trajtimin e çështjes së CTE-së – një sëmundje e rrezikshme e trurit që lidhet me goditjet e përsëritura në kokë.
Mes viktimave është oficeri i NYPD-së, Didarul Islam, 36 vjeç, emigrant nga Bangladeshi dhe baba i dy fëmijëve, ndërkohë që bashkëshortja e tij është shtatzënë. Një tjetër civil është plagosur rëndë dhe ndodhet në gjendje kritike, ndërsa edhe një punonjës i NFL-së është mes të lënduarve.
Autoritetet gjetën në makinën e autorit disa karikatorë municioni dhe një armë zjarri, ndërsa makina ishte e regjistruar në Nevada, ku ai rezulton posedues ligjor armësh.
Pamjet nga vendngjarja shfaqin njerëz që ikin në panik dhe forcat e rendit që shpallin alarmin për një autor aktiv. Brenda ndërtesës, punonjësit u mbyllën nëpër zyra, duke bllokuar dyert, ndërsa të shtënat jehonin në korridore. Policia konfirmoi se sulmuesi veproi i vetëm dhe hetimet për motivet e sakta vijojnë me intensitet.
