Një 13-vjeçar nga Zelanda e Re iu nënshtrua një operacioni të madh pasi kishte gëlltitur rreth 100 magnetë të fuqishëm që i kishte blerë në internet.
Pas katër ditësh me dhimbje të forta barku, ai u dërgua në spitalin Tauranga, në ishullin verior të Zelandës së Re, ku mjekët zbuluan se magnetët ishin bashkuar dhe kishin formuar katër zinxhirë brenda zorrëve të tij.
Kirurgët i hoqën magnetët dhe një pjesë të zorrëve të dëmtuara, sipas një raporti të publikuar nga mjekët e spitalit në New Zealand Medical Journal. Djaloshi, i cili nuk u identifikua, kishte gëlltitur rreth 80–100 magnetë neodim 5x2mm një javë para se të shtrohej në spital. Ai qëndroi tetë ditë nën kujdes mjekësor përpara se të dilte.
Zelanda e Re ndaloi shitjen e magnetëve të vegjël me fuqi të lartë që në vitin 2013, pasi qeveria paralajmëroi se fëmijët mund të pësonin dëmtime serioze nëse i gëlltisnin, qoftë nga kureshtja apo gjatë lojës me to si “stoli false”.
Megjithatë, autorët e raportit theksojnë se ndalimi është i vështirë për t’u zbatuar, pasi magnetët vazhdojnë të shiten lehtësisht përmes tregjeve online ndërkombëtare. Ata u blenë në platformën kineze Temu, e cila në një reagim për NBC News tha se po heton rastin dhe se do të heqë çdo produkt që nuk përputhet me standardet e sigurisë.
Zëdhënësit e Temu shtuan:
“Na vjen keq për ngjarjen e raportuar dhe i urojmë djalit shërim të shpejtë. Ne e marrim shumë seriozisht sigurinë e produkteve dhe monitorojmë vazhdimisht platformën tonë për të garantuar përputhjen me rregulloret lokale.”
Burimi: NBC NEWS
Pas publikimit të raportit, TEMU ka kontaktuar New Zealand Medical Journal për të mësuar më shumë rreth rastit në fjalë. Sipas redaktorëve, adoleshenti 13-vjeçar ka raportuar se magnetët janë blerë nga Temu, por ne nuk kemi qenë në gjendje ta verifikojmë këtë në mënyrë të pavarur.
Si masë paraprake, rishikuam fotografinë e magnetëve të publikuar në revistë dhe kontrolluam listimet e produkteve të ngjashme në platformën tonë. Magnetët aktualisht të disponueshëm janë në përputhje me rregulloret e Zelandës së Re, dhe produkte të tilla shiten gjithashtu nga shitës të tjerë të mëdhenj online dhe fizikë.
Edhe pse këto produkte janë të ligjshme për tregtim, ato mund të jenë të rrezikshme nëse gëlltiten, dhe ne mbështesim çdo përpjekje për të rritur ndërgjegjësimin publik për sigurinë e magnetëve.
Si një treg për palët e treta, Temu kërkon që të gjithë shitësit të respektojnë dhe veprojnë në përputhje me ligjet dhe standardet e sigurisë në fuqi, dhe ndërmerr masa të menjëhershme për të hequr çdo listim që nuk i përmbush ato.
