Ish-ambasadori i Holandës në Kosovë, Robert Bosch, është shprehur i bindur se ish-drejtuesit e Ushtrisë Çlirimtare të Kosovës – Hashim Thaçi, Kadri Veseli, Jakup Krasniqi dhe Rexhep Selimi – do të shpallen të pafajshëm nga Gjykata Speciale.
Në një intervistë për Ekonomia Online, Bosch kritikoi ritmin e ngadalshëm të procesit gjyqësor, duke e cilësuar atë të stërzgjatur dhe të lodhshëm si për të akuzuarit, ashtu edhe për publikun.
Ai u ndal edhe tek marrëdhëniet e Kosovës me partnerët ndërkombëtarë, duke theksuar se dinamika politike në vend ka ndryshuar ndjeshëm dhe se mungesa e një qeverie funksionale mund të prodhojë pasoja serioze në skenën ndërkombëtare.
Sa i përket dëshmisë së ish-komandantit suprem të NATO-s, Wesley Clark, Bosch u shpreh se ajo pritet të jetë në linjë me deklaratat e mëparshme të dëshmitarëve, sipas të cilëve brenda UÇK-së nuk ka ekzistuar një strukturë e organizuar me hierarki të qartë ushtarake.
Në thelbin e komenteve të tij, Bosch la të nënkuptohet se procesi në Hagë po lëviz drejt një epilogu që, sipas tij, do të rezultojë në pafajësinë e ish-drejtuesve të UÇK-së.
