Presidenti amerikan, Donald Trump, ka njoftuar rritjen me 10% të tarifave tregtare ndaj Kanadasë, pas një reklame të provincës Ontario, të cilën e konsideroi “të rreme dhe armiqësore”. Reklama përfshinte fragmente nga ish-presidenti Ronald Reagan mbi pasojat e tarifave dhe u transmetua gjatë ndeshjes së parë të World Series midis Toronto Blue Jays dhe Los Angeles Dodgers.
Trump reagoi në Truth Social, duke thënë se reklama duhej hequr menjëherë dhe se fakti që u transmetua përbën “shtrembërim serioz të fakteve dhe akt armiqësor”. Ai gjithashtu pezulloi bisedimet tregtare me Otavën.
Kryeministri i Ontarios, Doug Ford, njoftoi se pas konsultimeve me kryeministrin kanadez Mark Carney, fushata reklamuese do të ndalohet të hënën për të mundësuar rifillimin e negociatave.
Ende nuk është e qartë se cilat produkte do të preken nga tarifat shtesë, pasi shumica e eksporteve kanadeze përjashtohen nga marrëveshja tregtare SHBA-Meksikë-Kanada. Megjithatë, SHBA ka vendosur më parë 35% tarifa për mallrat jashtë marrëveshjes dhe 50% për çelikun dhe aluminin nga disa vende.
Trump dhe kryeministri Carney, të cilët ndodhen në samitin në Malajzi, nuk parashikojnë takim mes tyre. Zyrtarët e Shtëpisë së Bardhë dhe të Departamentit të Tregtisë nuk kanë komentuar ende masat e reja.
