Presidenti amerikan Donald Trump dhe ai rus Vladimir Putin zhvillojnë sot një takim kokë më kokë në Alaska, me fokus luftën në Ukrainë. Ky është takimi i tyre i parë pas gjashtë vitesh.
Trump deklaroi se Putin “nuk do të bëjë lojëra” gjatë bisedimeve, ndërsa presidenti ukrainas Volodymyr Zelensky, i përjashtuar nga diskutimet, ka paralajmëruar se vendimet e marra pa praninë e tij “do të jenë të pavlera”.
Takimi mbahet në tokë amerikane që dikur i përkiste Rusisë, pasi Alaska u ble nga SHBA në vitin 1867 dhe u bë shtet më 1959. Sipas ndihmësit presidencial rus Yuri Ushakov, vendndodhja është “logjike”, pasi vetëm Ngushtica e Beringut ndan dy vendet.
