Qendra për Kontrollin dhe Parandalimin e Sëmundjeve (CDC) në SHBA po përgatiten për një studim të madh për të shqyrtuar lidhjet e mundshme midis vaksinave dhe autizmit, sipas burimeve të Reuters. Ende nuk dihet nëse Robert F. Kennedy Jr., i njohur për qëndrimet e tij kundër vaksinave, do të përfshihet në këtë studim, ndërkohë që CDC dhe Departamenti i Shëndetësisë nuk kanë dhënë koment.
Ky zhvillim vjen në një kohë kur SHBA po përballet me një shpërthim të madh të fruthit, me mbi 200 raste dhe dy viktima në Teksas dhe New Mexico. Kennedy, i cili ka ndikim mbi CDC-në, ka vënë në dyshim sigurinë e vaksinës MMR (fruth, shytat, rubeola), duke minimizuar viktimat nga fruthi dhe duke theksuar se vaksinat duhet të jenë zgjedhje e prindërve.
Normat e diagnostikimit të autizmit në SHBA kanë pësuar rritje që nga viti 2000, kryesisht për shkak të skriningut më të gjerë, por ende nuk ka prova të besueshme që lidhin autizmin me vaksinat. Presidenti Donald Trump ka mbështetur Kennedy-n në këtë çështje, duke shprehur besimin se e vërteta do të zbulohet.
Në ndërkohë, emërimi i Dr. Dave Weldon si drejtor i CDC po shqyrtohet në Senat, ndërsa Dr. Jay Bhattacharya, i nominuar për drejtor të Institutit Kombëtar të Shëndetit, ka thënë se, sipas shkencës, nuk ekziston një lidhje mes vaksinave dhe autizmit, pavarësisht rritjes së rasteve të autizmit.
