Kryeministri hungarez Viktor Orban ka deklaruar se Ukraina nuk mund të pranohet as në Bashkimin Evropian dhe as në NATO, për shkak të konfliktit të armatosur me Rusinë. Sipas tij, pranimi i Ukrainës në këto organizata do të sillte pasoja të rënda për sigurinë e kontinentit dhe do ta tërhiqte Perëndimin drejt një përplasjeje të drejtpërdrejtë me Moskën.
“Nëse Ukraina bëhet pjesë e NATO-s, atëherë ne do të përfshijmë në aleancë një vend që është në luftë me Rusinë, gjë që do të çonte në një luftë të tretë botërore”, tha Orban gjatë një interviste për Radion Kossuth.
Ai shtoi se situata aktuale e Ukrainës – pa kufij të përcaktuar dhe pa siguri të brendshme – e bën të pamundur që vendi të integrohet në BE. Sipas Orbanit, ndihma për Ukrainën duhet të jetë ekonomike dhe jo përmes integrimit në strukturat euroatlantike.
Në samitin e BE-së të mbajtur më 26 qershor në Bruksel, Orban vuri veton ndaj një deklarate të përbashkët që do të hapte rrugën për nisjen e negociatave për anëtarësimin e Ukrainës në BE. Ai theksoi se qëndrimi i tij mbështetet nga rezultati i një referendumi të fundit në Hungari, ku 95% e votuesve u shprehën kundër integrimit të Ukrainës në BE.
Orban gjithashtu kujtoi se kishte mbajtur një qëndrim të ngjashëm në samitin e NATO-s në Hagë më 24-25 qershor, ku çështja e anëtarësimit të Ukrainës nuk ishte pjesë e axhendës dhe as nuk u përfshi në deklaratën përfundimtare.
