Presidenti ukrainas Volodymyr Zelensky ka deklaruar se lufta me Rusinë mund të zgjasë edhe dy ose tre vite të tjera, ndërsa u ka kërkuar liderëve evropianë të sigurojnë mbështetje financiare të vazhdueshme për Kievin gjatë kësaj periudhe.
“Ne nuk do të luftojmë për dekada, por është e rëndësishme që Evropa të tregojë se mund të ofrojë ndihmë të qëndrueshme për disa vite”, u shpreh Zelensky, duke shtuar se kjo periudhë përkon me kohën kur Komisioni Evropian pritet të zhbllokojë asetet e ngrira ruse për të financuar Ukrainën.
Ai konfirmoi gjithashtu se trupat ruse kanë hyrë në qytetin lindor të Pokrovskut, i cili mbetet një nga objektivat kryesorë të Moskës.
Në fund të deklaratës së tij, Zelensky i bëri thirrje presidentit amerikan Donald Trump që të ushtrojë presion ndaj presidentit kinez Xi Jinping për të reduktuar mbështetjen ndaj Rusisë, gjatë takimit të tyre të planifikuar në Korenë e Jugut.
