Një aksident hekurudhor u regjistrua mbrëmjen e së dielës në Sllovakinë perëndimore, midis zonave Svätý Jur dhe Pezinok, rreth 20 kilometra në veri të Bratislavës. Dy trena ekspres, njëri që udhëtonte nga Košice drejt kryeqytetit dhe tjetri nga Nitra, u përplasën duke shkaktuar dhjetëra të plagosur.
Në momentin e përplasjes në trena ndodheshin rreth 800 pasagjerë, por fatmirësisht asnjë prej tyre nuk pësoi lëndime të rënda. Policia e Bratislavës e përshkroi skenën si “kaotike”, ndërsa ekipet e emergjencës dhe oficerët ndihmuan në evakuimin dhe trajtimin e pasagjerëve.
Autoritetet kanë nisur hetimet për të zbuluar shkaqet e incidentit. Testet paraprake treguan se të dy makinistët ishin negativë për alkool dhe drogë, ndërsa hetuesit po analizojnë regjistrimet e sistemit të kontrollit për të përcaktuar nëse përplasja ndodhi për shkak të një gabimi njerëzor apo defekti teknik.
