Ekspertja shqiptare e teknologjisë, Drena Kusari, e lindur dhe rritur në Gjakovë, ka marrë një rol të ri të rëndësishëm në gjigantin amerikan Microsoft, duke u emëruar si “Corporate Vice President” dhe “General Manager”. Ky pozicion e vendos Kusarin ndër drejtuesit e lartë të një prej kompanive më të mëdha teknologjike në botë, duke shënuar një tjetër arritje të rëndësishme për gratë shqiptare në industrinë globale të teknologjisë.
Kusari ka një karrierë të ndërtuar me përvoja të shumta ndërkombëtare, duke punuar më parë në Goldman Sachs si analiste financiare, në McKinsey & Company si konsulente strategjie për kompani Fortune 500, si dhe në Lyft dhe Bumble në pozicione drejtuesish, ku u bë gruaja e parë që drejtoi rajonin Southwest dhe Hawaii për Lyft.
Ajo ka ndjekur arsimin në SHBA, ku përfundoi vitin e fundit të shkollës së mesme pas shpërnguljes nga Kosova në vitin 1999, më pas diplomoi me dy drejtime, Ekonomi dhe Diplomaci, në Occidental College dhe më vonë mori MBA nga Harvard Business School.
Përmes këtij rrugëtimi, Kusari është bërë një nga figurat shqiptare më të shquara në sektorin global të inovacionit dhe teknologjisë, duke shërbyer si shembull frymëzues për gratë që synojnë karriera të larta në industrinë globale.
Drena Kusari e ka njoftuar këtë emërim përmes rrjetit LinkedIn, duke shprehur gëzim për nisjen e këtij kapitulli të ri në karrierën e saj dhe duke theksuar rëndësinë e lidershipit dhe inovacionit në kompaninë ku tani ka një rol kyç.
