Gjykata e Posaçme kundër Korrupsionit dhe Krimit të Organizuar ka dërguar për gjykim çështjen ndaj kryebashkiakut të Shkodrës, Benet Beci, i akuzuar për shkelje të barazisë në tendera në bashkëpunim me gjashtë persona të tjerë.
Vendimi u mor më 17 mars 2026, pasi gjykata pranoi kërkesën e SPAK, duke vlerësuar se ekzistojnë prova të mjaftueshme për vijimin e procesit gjyqësor.
Hetimet lidhen me një tender të vitit 2019, kur Beci drejtonte KESH, për një kontratë rreth 700 mijë euro për një strategji në sektorin energjetik. Sipas prokurorisë, kriteret e vendosura kanë kufizuar garën, duke favorizuar një kompani të vetme, e cila fitoi me një ofertë pranë fondit limit.
Sipas SPAK, të pandehurit kanë ndikuar në disa faza të procedurës, nga përllogaritja e fondit deri te vlerësimi i ofertave, me qëllim favorizimin e operatorit fitues.
GJKKO kalon për gjykim kryebashkiakun e Shkodrës, Benet Beci, për shkelje në tendera
